2018 BANDRES+KAROLO MEMORIALA

Iñigo Lariz eta Laura Sola irabazle 2018ko Bandres-Karolo Memorialean

Iñigo Lariz elgoibartarrak eta Laura Sola uztarroztarrak irabazi dute aurtengo Bandres-Karolo Memorialaren lineako lasterketa, baita Memoriala bera ere, atzoko kronoigoerako denborak eta gaurko lineako probakoak batu ondoren. Bezperan botatako elur hauts geruzarekin ibilbide dotoreaz gozatu ahal izan dute gaur eskiatzaileek Keleta, Cortaplana eta Lakora mendigunean, Roncaliako eski pistetan bukatzeko. Partaideak pozarren ziren ibilbidearekin, “inoizko ikusgarriena” aipatzen zuten askok.

Aurten izena emandako 180 eskiatzaileak goizeko 8:00etan abiatu dira Arrakoko zelaigunetik, basoan barna Lapatiako leporaino eta handik Keletako lepoxka bateraino. Hasiera-hasieratik zazpikote bat jarri da buruan, Iñigo Lariz, Juanjo Goikoetxea, Javier Tirapu, Mikel Navarro, Igor Alzelai, Javi Dominguez eta Aitor Ajuriak osatua. Keletako leporaino elkarrekin joan dira guztiak. Juan Pito bentara jaitsi eta Cortaplanako maldei ekin dietenean, Iñigo Larizek hartu du aurrea, Javi Tirapu atzetik zuela, eta horrela egin dute helmugarainoko bidea. Atzetik, Javi Dominguezek osatu du podiuma, eta laugarren Juanjo Goikoetxea izan da.

Nesketan, Laura Solak buruan egin du probaren lehen zatia. Maite Maiorak gertutik jarraitu dio Keletarako igoeran, baina gero ezin izan dio eutsi erritmoari. Izaskun Zubizarretak, berriz, atzetik aurrera egin du proba, mendiko eskian duen eskarmentua eta eskola erakutsiz eta Laura Solarekin batera egin du ibilbidearen zati handi bat. Azkenean, ordea, uztarroztarrak erritmoa estutu eta beste behin hain maitea duen proba irabaztea lortu du. Bigarren Zubizarreta izan da, eta hirugarren, Maite Maiora.

Nabarmentzekoa izan da aurtengo ibilbidea, partaideen hitzetan. “Oso dotorea eta mendi-mendikoa”. Eguraldia lagun izan dute eskiatzaileek, eta bezperan eroritako elur hauts geruza opari bat da denentzat. Haizeak, hala ere, zakar samar jotzen zuen hainbat tartetan, eta horrek ez du Keletako ertzaren zeharkaldia egiten utzi, baina hala ere ikusgarria izan da aurtengoa. Bai Keletako igoera eta jaitsiera, bai Cortaplana eta Lakorakoa ere. Eta helmugaratzea ere elegantea, Roncaliako eski pistetan.

Arratsaldean, ohikoa denez, partaide guztiek artzainen ogi-papurrak dastatu ahal izan dituzte Izabako frontoian, bertako Kurruskla elkarteko kideek prestatuta. Urteen joanean, errotzen ari da Bandres-Karolo proba Erronkariko bailararen bihotzean, eta gero eta estuagoa da bertakoen eta kanpotik heldutako partaideen bat-egitea.

SAILKAPENAK

Gizonezkoak

1.- Iñigo Lariz                          2:33:44

2.- Javier Tirapu                    2:36:49

3.- Javi Dominguez             2:39:23

4.- Juanjo Goikoetxea       2:39:34

5.- Igor Alzelai                       2:39:55

 

Emakumezkoak

1.- Laura Sola                           3:03:00

2.- Izaskun Zubizarreta      3:05:51

3.- Maite Maiora                    3:09:18

4.- Igone Campos                 3:16:56

5.- Lide Leibar                        3:18:35

 

KONBINATUA KRONOIGOERA + LINEAKO PROBA

Gizonezkoak

1.- Iñigo Lariz                       3:12:42

2.- Javier Tirapu                 3:16:48

3.- Javi Dominguez          3:19:12

 

Emakumezkoak

1.- Laura Sola                           3:49:29

2.- Izaskun Zubizarreta      3:54:14

3.- Maite Maiora                    3:54:51